Daeth Amser i Newid Cymru yn ail orau yn wobr Class ar gyfer Cyfathrebu Orau yn Gwobrau Trydydd Sector Cymru neithiwr. Trefnwyd y noson wobrwyo yng Nghaerdydd gan Wales Council for Voluntary Action (WCVA).
Roedd aelodau o dîm Amser i Newid Cymru ac Eiriolwyr yr ymgyrch, pobl a phrofiad personol o broblemau iechyd meddwl sydd yn ymgyrchu o fewn eu cymunedau - yn bresennol i wylio Ant Metcalfe, Rheolwr Rhaglen Amser i Newid Cymru yn casglu'r wobr.
Roedd nifer o'r Eiriolwyr yn rhan o ymgyrch hysbysebu diweddar, gan gymryd rhan mewn cyfweliadau ar gyfer fideos ar y we, a chael tynnu eu lluniau ar gyfer posteri a hysbysebion eraill.
Nôd yr ymgyrch oedd dangos sut y gall ambell air bach fel ‘sut wyt ti’n teimlo?’ wneud gwahaniaeth mawr ac y gallwch fod yn arbennig trwy fod yn ffrind.
Dywedodd Ant Metcalfe:
“Mae Cyfathrebu gyda’r cyhoedd a dechrau sgwrs am iechyd meddwl yn angenreidiol i’r ymgyrch, felly mae’n wych i gael derbyn cydnabyddiaeth fel hyn ac rydym yn teimlo yn falch o’r hyn yr ydym wedi ei gyflawni. Rydym yn ddiolchgar i’r WCVA ac i bawb sydd yn rhan o Wobrau Trydydd Sector Cymru.
Mae rhannu profiadau a storiau pobl sy’n byw a phroblemau iechyd meddwl yn hollbwysig os am gael gwared o’r tabw o amgylch salwch meddwl a gofyn i bobl ddechrau siarad am iechyd meddwl, felly rwy’n ddiolchgar iawn hefyd i’n Eiriolwyr, gwirfoddolwyr sydd wrth galon yr ymgyrch sydd yn cyfrannu i’n marchnata a chyfathrebu mewn gymaint o wahanol ffyrdd.”
Roedd Kate Macnamara, sydd yn Eiriolwr Amser i Newid Cymru, yn bresennol yn y noson wobrwyo. Dywdodd hi:
“Roedd yn ffab i fod yn rhan o ddigwyddiad mor wych a gweld mor bell yr ydym wedi dod ers gwneud yr ymgyrch. Galla i ddim aros i weld faint yn rhagor y gallwn wneud a faint y gallwn ledaenu ymwybyddiaeth dros y flwyddyn nesaf. Rwy’n edrych ymlaen i weithio ar brosiectau newydd, gobeithio yn y gweithle. Mi fyse hynny yn wych!”
Mi allwch weld lluniau o'r digwyddiad ar ein tudalen Flickr