Mae gwaith ymchwil a gynhaliwyd ar yr hyfforddiant gwrth-stigma a ddyluniwyd gan Amser i Newid Cymru yn benodol ar gyfer gweithwyr gofal iechyd proffesiynol, yn dangos canlyniad eithriadol o gadarnhaol o ran helpu staff i adnabod arwyddion ymddygiad sy’n stigmateiddio a’u rôl yn lleihau stigma iechyd meddwl o fewn gwasanaethau.
Cyn cael yr hyfforddiant, dim ond 7% o bobl oedd yn teimlo'n eithriadol o hyderus wrth adnabod arwyddion stigmateiddio. Ar ôl yr hyfforddiant, roedd bron i hanner yr hyfforddeion (47%) yn teimlo'n eithriadol o hyderus wrth adnabod arwyddion stigma iechyd meddwl.
Roedd bron pob un (99%) o’r rhai a gafodd yr hyfforddiant o'r farn ei fod yn egluro rôl gweithwyr gofal iechyd proffesiynol o ran lleihau stigma iechyd meddwl cleifion, ac roedd 96% arall o’r hyfforddeion o’r farn bod cynnwys yr hyfforddiant yn berthnasol i'w rôl/gweithle.
Mewn meysydd eraill, dywedodd 98% o’r hyfforddeion fod eu dealltwriaeth o effaith stigma iechyd meddwl wedi gwella ar ôl cael yr hyfforddiant, ac roedd 90% o’r rhai a gafodd yr hyfforddiant yn teimlo’n fwy hyderus wrth gefnogi cleifion yn effeithiol mewn ffordd nad yw'n stigmateiddio.
Ymysg yr uchafbwyntiau allweddol eraill mae:
- Roedd 88% o'r hyfforddeion yn teimlo'n eithriadol o hyderus neu'n weddol hyderus bod ganddynt yr adnoddau/dulliau i leihau stigma cleifion ar ôl cael yr hyfforddiant.
- Yr agweddau mwyaf defnyddiol ar yr hyfforddiant a nodwyd gan yr hyfforddeion oedd y senarios/syniadau profiad uniongyrchol, y trafodaethau rhyngweithiol a'r cwis.
- Gwellodd gwybodaeth yr hyfforddeion am effaith stigma ar iechyd meddwl eu cleifion ar ôl cael yr hyfforddiant.
- Gwellodd hyder yr hyfforddeion bod ganddynt yr adnoddau/dulliau i leihau stigma iechyd meddwl cleifion ar ôl cael yr hyfforddiant gyda’r hyfforddeion yn dod yn fwy hyderus ar y cyfan.
Cynhaliwyd yr adroddiad gwerthuso hwn gan Mind i archwilio canfyddiadau'r modiwl hyfforddiant gwrth-stigma ar gyfer gweithwyr gofal iechyd proffesiynol ac i fesur ei effaith ar draws y sector gofal iechyd yng Nghymru. Er mwyn casglu data ansoddol ar gyfer yr adroddiad, gweinyddodd tîm Gwerthuso a Pherfformiad Mind arolwg ar-lein i weithwyr gofal iechyd proffesiynol ei gwblhau ar ôl iddynt fod ar y cwrs hyfforddi i ddysgu mwy am eu profiadau. Cafwyd o leiaf 181 o ymatebebion i'r arolwg gan gyfranogwyr.
Dywedodd Lowri Wyn Jones, Rheolwr Rhaglen Amser i Newid: “Mae’n wych gweld ymateb y rhai a gafodd yr hyfforddiant gwrth-stigma. Bydd yr adborth cyffredinol yn ein galluogi i adeiladu ar wella’r hyfforddiant a sicrhau bod gan weithwyr gofal iechyd proffesiynol yr adnoddau cywir i fynd i’r afael â stigma iechyd meddwl yn y sector gofal iechyd yng Nghymru.”
Cafodd yr hyfforddiant ei gynnal rhwng mis Medi 2022 a mis Mawrth 2023 ac amlinellir yr holl ganfyddiadau yn yr adroddiad.